ბარსელონაში ჩატარებული პოკერის ტურნირები ინდუსტრიის დიდ სახელებს ყოველთვის იზიდავდნენ. ამჯერად, PokerStars-ის მიერ გამართულ ჩემპიონატს ბარსელონას ლეგენდარული ფეხბურთელი, ჯერარდ პიკე დაესწრო. 

სათამაშო მაგიდებთან პიკეს გამოჩენა სურპრიზი არავისთვის ყოფილა - 30 წლის სუპერვარსკვლავი პოკერის ტურნირებს ხშირად ესწრება. როგორც ჩანს, ფეხბურთის გარდა, პიკე ბანქოშიც დაოსტატდა: €25.000 ევროიან Single Day High Roller-ზე მან არაჩვეულებრივი თამაში აჩვენა და მე-5 ადგილზე გავიდა. ბარსელონას მენეჯმენტის მიერ გადახდილ რამდენიმემილიონიან ხელფასს თუ გავითვალისწინებთ, შესაძლოა ტურნირზე მიღებული ანაზღაურება პიკესთვის დიდი არაფერი იყოს, მაგრამ ნებისმიერი მოთამაშისთვის €129.350 ევრო სოლიდურ საპრიზო თანხად ჩაითვლება. 

PokerNews-ის ჟურნალისტმა, სარა ჰერინგმა პიკეს რამდენიმე კითხვა დაუსვა:

სარა ჰერინგი: ყველაზე დიდი მიღწევა?

ჯერარდ პიკე: ზუსტად არ ვიცი... ვიყო კარგი მამა. 

სარა ჰერინგი: საოჯახო თამაშზე, ვის მიიწვევდი სტუმრად?

ჯერარდ პიკე: რთული სათქმელია. ალბათ, მესი, ლუი სუარესი და ინიესტა. 

სარა ჰერინგი: წარმოდგენა არ მაქვს ვინ არიან ეს ადამიანები... შინაური ცხოველი თუ გყავს?

ჯერარდ პიკე: არა. 

სარა ჰერინგი: თავისუფალი ადამიანი ყოფილხარ. ვინაა საუკეთესო მეგობარი ფეხბურთელებიდან?

ჯერარდ პიკე: პუიოლი და ფაბრეგასი. წესით, არც ეს სახელები გეტყვის რამეს.

სარა ჰერინგი: მართალი ხარ. გავიგე, რომ ჰარვარდის ბიზნეს სკოლაში ყოფილხარ ამ ზაფხულს. როგორი იყო?

ჯერარდ პიკე: იქ რამდენიმე დღე გავატარე. ბავშვობაში, მახსოვს, როგორი მოსაბეზრებელი იყო სკოლა. აქ კი ყველაფერი სხვანაირი ჩანდა. 

სარა ჰერინგი: როცა ცნობილ ადამიანს ნახულობ, რამდენად ემოციური ხდები?

ჯერარდ პიკე: როცა ახალგაზრდა ვიყავი, მაშინ გაცილებით გამოვხატავდი აღტაცებას. ეს წარსულში დარჩა. 

სარა ჰერინგი: როგორც ჩანს, ყველაფერი კარგად გამოგდის. რა არის შენი სუსტი მხარე?

ჯერარდ პიკე: თხილამურზე დგომა. 

სარა ჰერინგი: როგორ დაახასიათებდი საკუთარ თავს რამდენიმე სიტყვით?

ჯერარდ პიკე: მხიარული, ბედნიერი, გულწრფელი.